上堂老師做一次，你覺得明。睇答案，你又覺得合理。但到自己落手做，題目只係轉一轉問法，就突然唔知第一步應該做咩。
呢種情況，我見得最多嘅唔係「完全唔識」，而係同學以為自己已經清咗 Concept。尤其會計，最危險唔係你知道自己唔識，而係你記住咗一套 Steps，做「翻炒」題時冇問題，一去到陌生題、改個考核方式、題目條件改少少，就成套做法失靈。
如果你而家搵緊 BAFS補習，或者已經做咗好多 Past Paper 但分數仍然飄忽不定，我想你先停一停，問自己一條問題：你而家識嘅，究竟係「背熟左點做」，定係「明白點解要咁做」？對於重複既題型，呢兩種方法可能得出接近既分數。但考試時，結果可以差好遠。
「聽得明」唔等於真正清 Concept
好多同學判斷自己識唔識一個 topic，方法係：老師講嗰陣我跟到、睇 Notes 同教科書睇得明、對答案時知道點解個答案係咁。呢啲都重要，但只代表你「認得」個做法，未必代表你可以獨立運用。
真正清 Concept，應該係題目唔跟你熟悉嘅次序出，你仍然知道邊啲資料有用、邊啲只係干擾項；某一步數字唔同，你都知道背後個會計邏輯冇變；甚至題目冇明示你要用邊個方法，你都可以由條件推返應該點做。
如果你只可以答到「因為老師話呢類題係咁做」，其實你記住嘅係 Steps。固定既答題公式可以幫你開始，穩個Level 4，但追逐Level 5 或以上就要清晰了解概念先得。
背 Steps 最容易出事嘅三個位
第一，題目換咗字眼就認唔到。你平時可能靠某幾個關鍵字觸發一套固定做法，但考試題目唔一定每次用同一句說話。如果你只記常見字眼，題目換個寫法，你就會以為係新題型。
第二，資料次序一變就亂。教科書後面既練習題為左比你熟悉個別課題既基本概念，好多時會將資料寫得非常明顯。但係考試題目好多時涉及跨課題考核，或者會刻意隱藏某部分資料要你以考生身分去推敲。當資料分散而且多既時候，你係咪仍然擺脫「習慣既做題公式」，清晰知道自己要做乜？
第三，做到一半先發現前面錯咗。會計好多步驟係連住嘅。前面判斷錯，後面就算加減乘除你做得正確，你都會繼承左早前既錯誤。所以我成日叫同學：落筆之前，先諗清楚未來幾步既會計邏輯，確認清楚先開始書寫。
點分「粗心」定「Concept 未清」？
好多同學做錯題第一句都係：「我識㗎，只係唔小心。」呢句有時係真，但如果同一類錯誤重複出現，就唔應該再用「粗心」解釋。
你可以用一個好簡單嘅方法分：如果重新做一次、冇時間壓力、唔睇答案，你可以完整講出點解每一步要咁做，通常先比較似執行(execution) 問題；如果你要睇返 Notes、靠答案提示，或者只可以講「我記得係咁做」，就多數係 Concept 或判斷未穩。
製作錯題簿係不少同學會用既一個方法。但錯題檢討最重要唔係將正確答案抄返落去，而係寫低「我今次點解會行錯路」。係睇漏條件？唔明一個字？唔知道某項資料應該點樣運用？定係本身個邏輯未建立？搵到原因，下一次先有得改。
未清 Concept 就狂操卷，通常只會將錯法操熟
Past Paper 當然要做，但做卷唔係萬能。如果一個 topic 本身概念未清，你直接做完整卷，最常見嘅結果係：錯咗、對答案、記住今次點做，下一份卷再遇到變化題又錯。表面上你做咗好多，其實只係不停收藏答案，記憶某種特定做法。
我主張先 By Topic。集中做同一類題，目的係比自己見盡同一課題的不同問法。同一個 Concept，考試題目可以點樣包裝？資料可以點樣變？邊個位係考評局設計黎 Fake 考生既？Aim high 既同學需要訓練到自己「未見過條題目都知道點拆」。
當你可以獨立完成主要題型，再轉做完整試卷，先開始練時間分配、題目切換同考場取捨。呢個次序比一開始就追住做晒成份卷，更容易知道自己真正卡喺邊。
真正清 Concept，可以用呢個方法自測
下一次溫一個 BAFS topic，唔好只問自己「識唔識做」，試下用四個問題測自己。
一：如果冇 Notes，我可唔可以用自己說話講清楚個原理？二：題目改咗數字、次序或者字眼，我仲認唔認到考緊乜？三：我可唔可以解釋每一步點解要做，而唔係只背次序？四：做錯之後，我知唔知道自己係 Concept、判斷、閱讀、計算定時間問題？
如果四條入面有幾條答唔到，唔需要急住開下一份卷。返去補返最底層嗰個位，通常會比繼續死操有效。
BAFS補習真正要幫到你嘅，唔應該只係「教多次」
有啲同學搵 BAFS補習，係因為學校跟唔倒，想聽人再講一次課本內容。呢個需要當然存在，但如果你最大問題係「上堂識、自己做就錯」，再聽一次未必足夠。
對呢類同學，我會更重視三樣嘢：第一，將會計邏輯講成人話，令你知道點解；第二，教你見到題目時點判斷，而唔係見到題型就背招式；第三，做錯之後要分得出錯喺邊一層，先決定應該重溫、再做同類題，定係轉去限時操練。
所以揀 BAFS補習時，可以留意老師係咪只畀你一套「標準 Steps」，定係會引導你思考點解咁做、題目一變又點判斷。考試考核嘅高階能力係你可唔可以將學過嘅 Concept 用落陌生情境。當然，送分題目會比熟悉既情景同問法比你。
由「睇答案就明」變成「自己識起手」
如果你而家最大問題係睇答案就明、自己做就卡住，唔需要第一時間將問題歸咎於自己唔夠勤力。好多時你已經花咗時間，只係用錯咗方法。
先將一個 topic 拆返去最基本：我明唔明個原理？我知唔知每項資料影響乜？我可唔可以唔靠關鍵字都判斷到做法？再用 By Topic 驗證，最後先用完整卷測時間同穩定性。
當你開始由「背答案」轉成「解釋點解」，由「做完一份卷」轉成「知道今次錯喺邊」，BAFS 先會由一科好似好多 Steps 要記嘅科目，變成一套有邏輯、可以判斷嘅系統。
想再了解 Simon Sir 點樣教考試技巧同備試方法？
如果你想先了解自己而家係 Concept 未清、做題判斷有問題，定係只差考試節奏，可以按需要選擇試堂，先睇清楚課堂點教，再決定適唔適合自己；唔需要一開始就決定報讀。
WhatsApp Simon Sir：5436 9440